Lom bryggeri utvidar
Ytterlegare to nye tankar skal på plass i bryggeriet.
I 2015/16 vart det installert ti tankar, kvar på 1.000 liter. I 2019 kom det på plass to tankar til, kvar på 2.000 liter. Dette synte seg å heller ikkje vera nok.
Den eine av dei nye tankane har Lom bryggeri allereie reist opp, men den største må det til meir arbeid med. Det må setjast opp eit stort stillas og det blir brukt taljer frå taket til å reise opp tankane. I tillegg må delar av tappeanlegget demonterast.
– Det er små marginar, men vi har trua på at det skal bli plass til til den siste tanken òg, seier Håvard Grjotheim.
Den siste tanken vil romme 3.000 liter øl og har ei vekt på rundt eit tonn, inkludert ramma tanken er sendt til Lom på. For å få tankane opp i sjølve bryggeriet, har dei hatt hjelp av Håvard Kveum i Reidar Andersbakken AS med hjullastar.
Ola Gjeilo konkluderer med at produksjonskapasiteten i bryggeriet nærast er dobla sidan starten i 2016. – Vi stangar hovudet i taket når det gjeld kapasiteten. Frå å ha levert om lag 50.000 liter øl dei tre førre åra, vart det eit hopp til om lag 75.000 liter i 2020. Utfordringa vår ligg i å kunne opparbeide oss nok øl på lager inn mot sommarsesongane. Dette vi gjer nå, vonar vi skal vera det som skal til for at vi skal greie å produsere nok øl. Oppe i sjølve bryggeriet er det ikkje plass til fleire tankar nå, seier Gjeilo, som fortel at dei samla kostnadene på denne siste investeringa ligg på om lag 375.000 kroner.
