Oppslag i GD 17/1 22
Av Helene Hovden 17.01.22
SJÅ OPPSLAG I GD
Dei har aldri produsert så mykje som dei gjorde i fjor. Likevel greier dei ikkje å lage nok øl til folket. Det håpar dei det blir slutt på nå. – Det er motiverande når problema går på den kanten, seier medeigar i Lom bryggeri, Ola Gjeilo. 2021 skreiv seg inn i historiebøkene som det beste året i bryggeriets historie. 2021 vart også året da bryggeriet voks seg ut av lokala.
– Produserer for lite øl
Eit komplett anlegg, tre gonger så stort som det dei har i dag, ligg på lagring. Målet er at det skal takast i bruk i løpet av 2022. – I fleire år har vi ikkje greidd å produsere nok øl. Det er gjæringskapasiteten vår som har vore for knapp. Fortvila veit du, seier Gjeilo. Det til trass for at dei nesten har dobla kapasiteten frå starten i 2016. Likevel slit dei med å levere det marknaden spør etter. Spesielt om sommaren er dei på hælane. Der trivst dei ikkje. Aller helst vil dei vere fremst i skoa, Gjeilo og kompanjong Olav Grjotheim.
Køyrde det til Lom
Da dei på haustkanten i fjor fekk nyss om eit bryggeri i Oslo som skulle selja relativt nytt utstyr, slo dei til. Men, dei fekk seg ei lita overrasking da dei såg kor stort det var. – Det er om lag tre gonger så stort som det vi har i dag. Med på lastebilane til Lom vart eit brygghus på om lag 2.500 liter og 10 gjæringstankar. For å få plass til det nye anlegget må det byggjast på. Det ombygde fjøset og låven i Grjotheim har vorte for lite. – Det er planer om eit påbygg på 200 kvadratmeter. Da får vi plass til komplette anlegg som kan køyrast kvar for seg, seier Gjeilo. Det er Håvard Grjotheim som eig bygningsmassa og Lom bryggeri leiger lokala. Slik skal det også vere i framtida.
Stor kapasitet
I dag bryggjar dei om lag 1.000 liter om gongen og har ein lagringskapasitet på 19.000 liter. Når det nye anlegget står klart vil dei kunne bryggje mellom 2.500 og 3.000 liter, i tillegg til det gamle. Samla gjæringskapasitet blir da på om lag 60.000 liter. Gjeilo fortel at dei har eit mål om å kunne setja anlegget i drift iløpet av 2022. – Eg er spent. Vi ser ikkje for oss full drift av nyanlegget umiddelbart. For å kunne handtere dette må vi også byggje ein heilt ny organisasjon som er tilpassa dette nivået.
– Må halde att
I dag har bedrifta fem tilsette, dei fleste i deltid. Gjeilo utelukker ikkje at satsinga vil føre til at dei treng fleire i arbeid, men det er slik dei vil ta etter kvart. Nå er det fullt fokus på å produsere alt dei kan i eksisterande lokale. Dei har alt begynt å tenkje på sommaren. – Vi er uroa for at det skal bli for knapt i år og. Hittil i januar har vi bryggja 7.000 liter. Vi ser mange marknader som vi ikkje har vore borti enda, nettopp fordi vi må halde att. Samstundes får vi mange fine tilbakemeldingar. Det er nesten rørande kor mykje positivt ein høyrer. Det gjev oss ein veldig drivkraft.
